Hunc Fauno et nympha genitum Laurente Marica Accipimus. Fauno Picus pater: isque parentem Te, Saturne, refert: tu sanguinis ultimus auctor. Filius huic, fato divûm, prolesque virilis Nulla fuit, primaque oriens erepta inventa est. Sola domum et tantas servabat filia sedes, Jam matura viro, iam plenis nubilis aunis. Multi illam magno e Latio totaque petebant. Ausonia: petit ante alios pulcherrimus omnes Turnus, avis atavisque potens: quem regia coniux Adiungi generum miro properabat amore; Sed variis portenta deûm terroribus obstant. Laurus erat tecti medio in penetralibus altis, Sacra comam, multosque metu servata per annos; Quam pater inventam, primas quum conderet arces, Ipse ferebatur Phoebo sacrasse Latinus, Laurentesque ab ea nomen posuisse colonis. Huius apes summum densae (mirabile dictu), Stridore ingenti liquidum trans aethera vectae, Obsedere apicem; et, pedibus per mutua nexis, Examen subitum ramo frondente pependit. Continuo vates, Externum cernimus, inquit, Adventare virum, et partes petere agmen easdem Partibus ex isdem, et summa dominarier arce. Praeterea, castis adolet dum altaria taedis, Vt iuxta genitorem adstat Lavinia virgo, Visa (nefas) longis comprendere crinibus ignem, Atque omnem ornatum flamma crepitante cremari;
Regalesque accensa comas, accensa coronam Insignem gemmis: tum fumida lumine fulvo Involvi, ac totis vulcanum spargere tectis. Id vero horrendum ac visu mirabile ferri: Namque fore illustrem fama fatisque canebant Ipsam; sed populo magnum portendere bellum. At rex sollicitus monstris, oracula Fauni, Fatidici genitoris, adit, lucosque sub alta Consulit Albunea: nemorum quae maxima sacro Fonte sonat, saevamque exhalat opaca mephitim. Hinc Italae gentes, omnisque Oenotria tellus, In dubiis responsa petunt. Huc dona sacerdos Quum tulit, et caesarum ovium sub nocte silenti Pellibus incubuit stratis, somnosque petivit; Multa modis simulacra videt volitantia miris, Et varias audit voces, fruiturque deorum Colloquio, atque imis Acheronta adfatur Avernis. Hic et tum pater ipse petens responsa Latinus Centum lanigeras mactabat rite bidentes, Atque harum effultus tergo stratisque iacebat Velleribus. Subita ex alto vox reddita luco est: connubiis natam sociare Latinis,
O mea progenies, thalamis neu crede paratis.
Externi veniunt generi, qui sanguine nostrum
Nomen in astra ferant, quorumque ab stirpe nepotes,, ,, Omnia sub pedibus, qua sol utrumque recurrens
Adspicit Oceanum, vertique regique videbunt.
Haec responsa patris Fauni, monitusque silenti
Nocte datos, non ipse suo premit ore Latinus: Sed circum late volitans iam Fama per urbes Ausonias tulerat; quum Laomedontia pubes Gramineo ripae religavit ab aggere classem. Aeneas, primique duces, et pulcher Iulus, Corpora sub ramis deponunt arboris altae; Instituuntque dapes, et adorea liba per herbam Subiiciunt epulis (sic Iuppiter ille monebat), Et cereale solum pomis agrestibus augent. Consumptis hic forte aliis, ut vertere morsus Exiguam in cererem penuria adegit edendi, Et violare manu malisque audacibus orbem Fatalis crusti, patulis nec parcere quadris; Heus! etiam mensas consumimus? inquit Iulus; Nec plura, adludens. Ea vox audita laborum Prima tulit finem, primamque loquentis ab ore Eripuit pater, ac stupefactus numine pressit. Continuo, Salve fatis mihi debita Tellus, Vosque, ait, o fidi Troiae salvete Penates. Hic domus, haec patria est. Genitor mihi talia,namque Nunc repeto, Anchises fatorum arcana reliquit: Quum te, nate, fames ignota ad litora vectum Accisis coget dapibus consumere mensas; Tum sperare domos de fessus, ibique memento Prima locare manu molirique aggere tecta. Haec erat illa fames; haec nos suprema manebat, Exitiis positura modum.
Quare agite, et primo laeti cum lumine solis,
Quae loca, quive habeant homines, ubi moenia gentis, Vestigemus, et a portu diversa petamus. Nunc pateras libate Iovi, precibusque vocate Anchisen genitorem, et vina reponite mensis. Sic deinde effatus frondenti tempora ramo Implicat, et Geniumque loci, primamque deorum Tellurem, nymphasque, et adhuc ignota precatur Flumina: tum Noctem, Noctisque orientia Signa, Idaeumque Iovem, Phrygiamque ex ordine Matrem, Invocat, et duplices Caeloque Ereboque parentes. Hic Pater omnipotens ter caelo clarus ab alto Intonuit: radiisque ardentem lucis et auro Ipse manu quatiens ostendit ab aethere nubem. Diditur hic subito Troiana per agmina rumor, Advenisse diem, quo debita moenia condant. Certatim instaurant epulas, atque omine magno Crateras laeti statuunt, et vina coronant.
Postera quum prima lustrabat lampade terras Orta dies, urbem et fines, et litora gentis Diversi explorant: haec fontis stagna Numici, Hunc Thybrim fluvium, hic fortes habitare Latinos. Tum satus Anchisa delectos ordine ab omni Centum oratores augusta ad moenia regis Ire iubet, ramis velatos Palladis omnes; Donaque ferre viro, pacemque exposcere Teucris. Haud mora: festinant iussi, rapidisque feruntur Passibus. Ipse humili designat moenia fossa, Moliturque locum: primasque in litore sedes,
Castrorum in morem, pinnis atque aggere cingit. Iamque iter emensi, turres ac tecta Latinorum Ardua cernebant iuvenes, muroque subibant. Ante urbem pueri, et primaevo flore iuventus, Exercentur equis, domitantque in pulvere currus; Aut acres tendunt arcus, aut lenta lacertis Spicula contorquent, cursuque ictuque lacessunt. Quum praevectus equo longaevi regis ad aures Nuntius ingentes ignota in veste reportat
Advenisse viros. Ille intra tecta vocari
Imperat, et solio medius consedit avito. Tectum augustum, ingens, centum sublime columnis, Vrbe fuit summa, Laurentis regia Pici, Horrendum silvis et relligione parentum. Hic sceptra accipere, et primos attollere fasces Regibus omen erat; hoc illis curia templum, Hae sacris sedes epulis; hìc ariete caeso Perpetuis soliti patres considere mensis. Quin etiam veterum effigies ex ordine avorum Antiqua e cedro, Italusque, paterque Sabinus Vitisator, curvam servans sub imagine falcem, Saturnusque senex, Ianique bifrontis imago, Vestibulo adstabant; aliique ab origine reges, Martia qui ob patriam pugnando vulnera passi. Multaque praeterea sacris in postibus arma, Captivi pendent currus, curvaeque secures, Et cristae capitum, et portarum ingentia claustra, Spiculaque, clipeique, ereptaque rostra carinis.
« 前へ次へ » |